Wala sang rekord ang Securities and Exchange Commission (SEC) tuhoy sa iban pa nga posible nga ginansya ukon income sources ni Vice President Sara Duterte kag sang iya bana nga si Atty. Manases “Mans” Carpio.
Ini ang ginpahayag ni SEC Company Registration and Monitoring Department Director Gerardo Fernando Del Rosario sa cross-examination sa impeachment trial.
Suno kay Del Rosario, wala sa rekord sang SEC ang income ni Duterte sang pribado pa ini nga indibidwal kag nagapraktis sang iya propesyon, lakip ang iya compensation bilang vice mayor, mayor kag vice president.
Wala man sila sang impormasyon tuhoy sa income ni Carpio halin sa iya legal practice.
Ginpahayag man sang saksi nga indi sakop sang mandato sang SEC ang pagrekord sang inheritance, baligya sang real property kag pag-appraise sang bili sang mga duta nga ginadeklara sa SALN.
Samtang, para sa income nga posible naghalin sa mga korporasyon nga ginaatubang sa trial, ginpahayag ni Del Rosario nga corporate records lamang ang ara sa SEC, lakip ang mga dokumento tuhoy sa pagdeklara ukon indi pagdeklara sang dividends.
Dugang niya, ang SEC mahimo lamang magpamatuod sa korte sang impeachment sang mga impormasyon nga yara sa mga dokumento nga ginpangayo sa ahensya.
