Ginalauman sang Department of Justice ang “daku nga development” antes matapos ang tuig angot sa extradition request sang United States for Kingdom of Jesus Christ founder nga si Apollo Quiboloy.
Suno kay Quezon 4th District Representative Keith Micah Tan, ini ang commitment sang DOJ sa tion sang budget deliberations sa Kamara.
Samtang, ginpahayag ni Akbayan Party-list Representative Percival Cendaña nga ila pasabton ang DOJ sa nasambit nga commitment.
Sa subong, gina-finalize sang DOJ ang review kag preparasyon sang extradition petition matapos pormal nga gin-request sang US ang extradition ni Quiboloy sang Agosto.
Suno sa DOJ, kinahanglan nga ma-review sang maayo ang mga dokumento antes ini mapasaka sa korte.
Sa tion nga ma-file na ang petisyon, ipatigayon sang Regional Trial Court ang judicial process kag i-review kun ang request ang yara sa sulod sang laye kag sa Philippines-US extradition treaty.
Detained subong sa Pilipinas si Quiboloy kag nagapangatubang man sang separado nga kaso sa US, lakip na ang mga kaso may kaangtanan sa sex trafficking. Apang ginapanginwala sini ang mga alegasyon batuk sa iya.
