KORONADAL CITY – Ginbawian sang kabuhi ang isa ka anay nga preso matapos nga magbato sa kapulisan sa Purok Mabuhay 2, Barangay Carpenter Hill, Koronadal City.
Ginkilala ang napatay nga si Joey John Gabucan, 40-anyos, nga anay na nga napreso bangud sa involvement suno pa sini sa illegal nga droga.
Sa interview sang Bombo Radyo Koronadal kay ex-Barangay Captain Crisostomo Gabud sang Barangay Carpenter Hill, may gin-sita ang grupo ni Gabucan sa ila lugar kun diin ginsipa pa gani sang upod sini ang isa ka nakamotorsiklo.
Ini ang rason kun ngaa may nagreport sa kapulisan sa presensiya sang tatlo ka kalalakihan nga nagapang-harass kag nagabitbit sang armas.
Suno naman kay PLt.Col. Hover Antonio, sa pagresponder sang kapulisan, sa baylo nga magsurrender sang matawhay nagpalagas suno pa ang mga suspek kag una nga nagpalupok sa responding team si Gabucan rason nga ginbalusan ini sang kapulisan kag nagluntad ang engkwentro tubtob naigo ini kag ginbawian sang kabuhi.
Naarestar naman ang kaupod sini kun diin nakumpiska man ang pila ka sachet sang ginapatihan nga shabu kag armas luthang.
Sa karon, nagapadayon ang imbestigasyon sa nagluntad nga hitabo.
