KORONADAL CITY- Temporaryo nga suspendido anay ang klase sa bahin sang Datu Dalandag National High School sa Ginatilan, Pikit, Cotabato makaligad ang nagluntad nga pagpangluthang sa isa ka estudyante sang nasambit nga buluthuan sa sulod mismo sang compound sini sa Barangay Manaulanan, Pikit, Cotabato.
Sa interview sang Bombo Radyo Koronadal kay PMaj. Arvin Cambang-COP sang Pikit MPS, ginkilala sini ang biktima nga si John Rey Cablas Cabuga, 23 anyos, grade 11, student sang Datu Dalandag High School nga residente sang Purok 6, Barangay Baliki, Midsayap, Cotabato.
Ginpahayag pa sini nga samtang naga eskwela ang biktima isa man ini ka aktibo nga miyembro sang Citizen Active Auxillary o CAA.
Sa imbestigasyon sang mga otoridad, nagsulod sa campus ang 2 ka mga wala pa nakilal-an nga mga persona kag hinali na lamang suno pa nga ginluthang ang biktima// Dead on the spot ang biktima bangud sa igo nga naangkon sini halin sa mga suspek.
Madasig naman nga nagpalagyo ang mga ini sa wala pa matumod nga direksyon.
Kasamtangan naman nga naga patigayon sang hot pursuit operation ang tropa sang 90th Infantry Battalion kag mga kapulisan batok sa mga yara sa likod sang pagpangluthang.
