Ginkumpirmar ni Davao City Mayor Sebastian “Baste” Duterte sa impeachment trial nga business associate niya si businessman Jaime T. Cruz, nga ginakilala man niya bilang abyan sang iya amay nga si anay Pangulong Rodrigo Duterte.
Ginkumpirmar man ni Baste nga pareho sila ni Cruz nga shareholders sa Chinese Gen Bee Foods Corporation, diin nakalista man bilang shareholder ang iya utod nga si Davao City 1st District Representative Paolo Duterte.
Nahibaluan nga nagarepresentarS si Cruz ang sa JTC Group of Companies Philippines Inc., nga may pinakadako nga subscribed interest sa Gencorp Industries Inc.
Nakakuha ang nasambit nga kompanya sang 19 ka kontrata halin sa Davao City government nga naglab-ot sa masobra P33 milyon halin 2022 tubtob 2026.
Apang ginpahayag ni Baste nga wala siya kahibalo nga isa sa mga nagapanguna nga stockholder sang Gencorp si Cruz kag wala niya ginalantaw ang corporate records ukon abstracts of quotations sang kompanya.
Suno sa alkalde, ginpangutana lamang niya ang City Administrator kun nagsunod sa nagakaigo nga proseso ang mga kontrata kag kun kwalipikado ang Gencorp.
Sang ginpamangkot kon tugutan pa niya ang Gencorp nga makakuha sang mga kontrata sa siyudad kon nahibaluan niya nga stockholder sini si Vice President Sara Duterte, sabat ni Baste nga indi niya ini pagtugutan.
