KORONADAL CITY- May persons of interest na ang mga kapulisan sa nagluntad nga pagpangluthang-patay sa mga tatlo ka indibidwal sa banwa sang Surallah South Cotabato.
Ini ang ginpahayag ni Pol. Col. Nathaniel Villegas, Provincial Director sang SCPPO sa interbyu sang Bombo Radyo Koronadal.
Suno sa iya, may natumod na sila nga mga persona apang padayon sa gihapon ang ila nga maid id nga imbestigasyon agud mapasiguro nga insakto ang ila nga imbestigasyon.
Ginpahayag sang opisyal nga tuman ka kontrobersyal ang ini nga panghilitabo bangud nalamita pa ang pangalan sang PDEA nga ginatumod nga ang ila nga mga tinawo ang may kahimuan sini.
Kung madumduman ginluthang ang tatalo ka mga indibidwal samtang nagainuman sang hinali nagsulod ang isa ka grupo sang mga armado nga kalalakihan nga nakasukso sang itom nga uniporme kag naka-bonnet.
Nagpakilala pa nga mga katapu sang PDEA ang mga suspek kag wala sang kaluoy nga ginpamusil ang mga biktima.
Samtang, gilayon nagpaguwa sang statement ang PDEA-Region 12 nga nagakundenar sa hitabo kag ginpanginwala nga tinawo nila ang may kahimuan sa krimen.
Sa karon ginapsiguro ni Col. Villegas nga pagahimuon nila ang tanan agud maangkon na sang pamilya sang biktima ang hustisya
