Nagbalik na sa Pilipinas si Pangulong Ferdinand Marcos Jr. matapos ang limang araw na working visit sa Singapore, kung saan nakipagpulong siya sa mga business leader at negosyante upang hikayatin ang mas maraming pamumuhunan sa bansa.
Sa kaniyang arrival statement, ibinahagi ng pangulo ang mga naging resulta ng kaniyang paglahok sa 24th Forbes Global CEO Conference, kabilang ang mga planong pagpapalawak ng negosyo at mga bagong oportunidad sa pamumuhunan.
Kabilang sa mga proyektong binanggit ni Marcos ang pagpapalawak ng operasyon ng FedEx sa Clark, ang $700 milyong pamumuhunan ng Mitsubishi Corporation sa Ayala Corporation, at ang planong pagpapalawak ng kapasidad sa paglikha ng kuryente ng Vena Energy sa Pilipinas.
Itinampok din ng pangulo ang $20-bilyong Luzon Economic Corridor, na naglalayong palakasin ang imprastraktura at pasiglahin ang paglago ng negosyo sa bansa.
Ayon kay Marcos, inaasahang magbubukas ang mga pamumuhunang ito ng mas maraming oportunidad sa trabaho, magdadala ng makabagong teknolohiya, at magpapasok ng karagdagang kapital sa ekonomiya ng Pilipinas.
Binigyang-diin din niya ang patuloy na pagsisikap ng administrasyon na labanan ang korapsyon at pasimplehin ang mga proseso sa pamahalaan upang mapadali ang pagnenegosyo at mahikayat ang mas maraming mamumuhunan.
