Bisan pa sa pagnubo sang foreign reserves sang Pilipinas sa USD100 bilyon sang Setyembre, ginpasalig sang Bangko Sentral ng Pilipinas (BSP) nga bastante gihapon ini agod matubag ang kinahanglanon sang pungsod sa importasyon kag pagbayad sang mga utang sa iban nga pungsod.
Base sa preliminary data nga ginpagwa sang BSP sang Oktubre 7, nagnubo ang gross international reserves (GIR) halin sa USD104.8 bilyon sang Agosto.
Suno sa BSP, nag-ugat ang pagnubo sa net foreign exchange operations kag pagbag-o sang valuation sang mga bulawan kag foreign currency-denominated reserve assets sang sentral nga bangko.
Nakaapekto man sa pagnubo ang pagbayad sang external debt kag pagkuha sang foreign currency halin sa mga deposito sang nasyonal nga gobyerno kag BSP.
Sa pihak sini, ginpahayag sang BSP nga ang GIR nagaserbi nga pinansyal nga buffer sang pungsod agod masuportahan ang importasyon, matuman ang mga obligasyon sa utang sa iban nga pungsod kag maatubang ang posible nga mga kakulian sa global nga ekonomiya.
Ang GIR nagalakip sang mga foreign assets pareho sang foreign currencies, deposits, securities, bulawan kag iban pa nga reserve assets nga ginahuptan sang sentral nga bangko.
Ang pagnubo sang GIR nagapakita sang pagbag-o sa foreign reserves sang pungsod, apang suno sa BSP, importante nga may igong reserba ang Pilipinas agod mapadayon ang pinansyal nga estabilidad kag matuman ang mga kinahanglanon sa internasyonal nga transaksyon.
