Nagdangat na sa apat ang mga Pilipino nga napilasan sa pag-atake sa King Khalid International Airport sa Riyadh, Saudi Arabia, sang Sabado, Oktubre 10.
Tatlo sa mga biktima ang yara sa intensive care unit (ICU), samtang ang isa naman ang ginapaabot nga makaguwa na sa ospital, suno sa Department of Migrant Workers (DMW) sang Domingo, Oktubre 11.
Wala naman sang Pilipino nga nareport nga napatay sa insidente.
Sa kabug-usan, 12 ka tawo ang napatay kag 309 ang nasamaran sa pag-atake sang Houthi sa nasambit nga airport.
Suno kay Labor Attaché Dominador Salanga sang Migrant Workers Office (MWO) sa Riyadh, padayon nga nagahatag sang bulig ang ila talatapan kag ang Overseas Workers Welfare Administration (OWWA) sa mga napilsan.
Nagapakig-angot man sila sa lokal nga mga awtoridad kag ospital agud makumpirmar kun may iban pa nga Pilipino nga apektado.
Ginapaalintunan sang DMW ang mga OFW nga likawan ang mga lugar nga posible mangin target sang pag-atake kag sundon ang mga abiso sang embahada, konsulado kag MWO.
Ginapanumdom man ang mga OFW nga magapauli sa Pilipinas nga kontakon anay ang ila airline antes magkadto sa airport kag chekyaron ang ila email para sa mga update.
Ginpaandaman man sila nga indi magkuha ukon mag-post sang mga litrato kag video sang pag-atake sa social media bangod ginadumilian ini sang kasuguan sa Saudi Arabia.
