Gindalasa man sang pagbaha ang 3 ka mga Purok sa Barangay San Jose, Norala, South Cotabato bangud sa pag-awas sang irrigation canal sa nasambit nga lugar.
Ini ang ginkumpirmar ni Ms. Aiza Lim, MDRRMO sang banwa sang Norala sa interview sang Bombo Radyo.
Suno kay Lim, bangud sa pagbuhos sang mabaskog nga ulan, nag-awas ang tubig baha sa irrigation canal kag nagsulod sa mga panimalay sang mga residente.
Isa pa sa rason nga nakita sang mga ini kun ngaa nagbaha, amo ang pagsupon sang pila ka mga higko sa canal kag kakitid sini.
Bangud sa insidente, may isa man ka haya ang nadalahig kun diin tatlo ka adlaw pa lamang nga napatay ang ila himata nga nangin apektado sang baha.
Sa karon, wala pa nag-subside ang tubig-baha kag ginakakulbaan ang pagdugang sini matapos nga nagbunok naman ang mabaskog nga ulan.
Ginpasalig man ni Lim nga nakamonitor sila sa sini nga sitwasyon agud makapatigayon sang rescue sa tion nga maglab-ot sa worst case scenario ang baha..
