Nagpagwa sang subpoena ang Senate Impeachment Court para kay Davao City Mayor Sebastian “Baste” Duterte kag ginmanduan ini nga mag-atubang sa impeachment trial sang iya utod nga si Vice President Sara Duterte sa Setyembre 23.
Kabahin si Mayor Baste sa mga testigo nga ginpatawag may kaangtanan sa Article II sang Articles of Impeachment, nga nagatalakay sa alegasyon sang unexplained wealth batok sa Bise Presidente.
Suno sa House prosecution panel, posible nga pamangkuton si Mayor Baste parte sa Gencorp Industries, Inc., isa ka kompanya nga gina-link kay VP Sara, ilabi na kun may mga transaksyon ini sa Davao City government sang panahon nga alkalde pa si Baste.
Ginpahayag man sang prosecution spokesperson nga si Benjamin Tolosa Jr. nga posible ma-classify bilang hostile witness si Mayor Baste kun ang iya mangin testimonya ukon posisyon magakontra sa interes sang prosecution.
Samtang, ginpatawag man sang impeachment court sanday Atty. Ariel Ronquillo kag Rendell Sopeña para sa Setyembre 21 tubtob 23. Ginmanduan naman sanday Mayor Baste, Atty. Gary Samonte kag Police Major Jerickson Sangalang nga mag-atubang sa korte sa Setyembre 23.
