Ginpabutyag sang Korte Suprema nga ang mga desisyon sang korte nagabase sa mga ebidensya nga ginapresentar kag sa nagakaigo nga mga probisyon sang layi.
Suno kay Supreme Court Spokesperson Atty. Camille Sue Mae Ting, ang pagresolba sang mga kaso nga ginadumalahan sang korte ginahimo suno sa layi kag sa mga ebidensya nga yara sa rekord sang kaso.
Kaangot sini ang ginpahayag ni Vice President Sara Duterte nga wala na siya sang pagsalig sa korte matapos ang iya pag-atubang sa Quezon City Regional Trial Court.
Ginpahayag sang Bise Presidente ang iya kakulang sang pagsalig indi lamang sa korte kundi pati man sa mga kapulisan.
Ginhimo niya ini nga pahayag samtang naglagak sang piyansa matapos ini ma-isyu-han sang arrest warrant may kaangtanan sa kaso nga grave threats nga iya ginapangatubang.
Samtang, ginpahayag ni Atty. Ting nga ginarespeto sang Korte Suprema ang personal nga panan-aw kag pahayag sang Bise Presidente.
Apang ginpabutyag man niya nga sa pagdesisyon sang korte, ang mga kaso ginabase sa nagakaigo nga balaod kag sa mga ebidensya nga ginpresentar sa korte.
