Kinahanglan nga tan-awon ang mga manggad ni Vice President Sara Duterte halin pa sang pa-umpisa sini sa serbisyo publiko agud mabalanse kun may unexplained wealth ukon posible nga anomalya sa iya mga asset.
Sa interview sang Bombo Radyo Koronadal kay Retired Judge Lorenzo Balo, Provincial Legal Adviser sang Sultan Kudarat, iya ginpahayag nga indi lamang dapat ikonsiderar ang tion nga nangin impeachable officer si Duterte, kundi lakip ang iya mga manggad kag financial records halin sang nagsugod ini bilang government servant.
Samtang, ginpahayag man ni Balo nga indi pa kinahanglan nga ipatawag sang prosekusyon bilang hostile witness ang bana sang Bise Presidente nga si Atty. Manases “Mans” Carpio.
Para kay Judge Balo, mas angay nga depensa ang magpresentar kay Carpio bilang witness agud mahatagan sang pagpaathag ang mga isyu may kaangtanan sa manggad kag financial records sang iya asawa kag sang ila pamilya.
Ginpabutyag man ni Balo nga indi pa mahimo nga magkonklud nga may iligal ukon unexplained wealth ang Bise Presidente base lamang sa mga ginpresentar nga impormasyon bahin sa iya mga negosyo.
Suno sa iya, kinahanglan pa nga usisaon ang mga dokumento pareho sang BIR records, income tax returns, bank records kag iban pa nga financial documents agud mas mapat-od ang kamatuoran sa isyu sang unexplained wealth.
