KORONADAL CITY- Malayo nga mangin isa ka bagyo ang isa ka Low Pressure Area ukon LPA nga ara sa sulod sang Philippine Area of Responsibility (PAR) bangud mahinay lamang ang kabaskugon sini kun ikumpara sa kabaskugon sa lebel sang isa ka bagyo.
Ini ang nangin pahayag ni Mr. Benrio Binan, Pag-asa Gensan Forecaster sa interbyu sang Bombo Radyo Koronadal.
Suno sa iya, base man sang obserbasyon kag monitoring sang PAG-ASA Gensan, mahina ang LPA kag wala na sang chansa nga mangin isa ka bagyo ang nasambit nga kalain nga paniempo.
Nagpaandam naman ini nga indi sa gihapon mahimo nga magpakampante ang tanan bangud may ara naman sang panibag-o nga nakita nga isa ka kalain sang paniempo sa nasidlangan nga bahin sang Mindanao nga dako ang posibilidad nga mangin isa ka bagyo bangud mahimo pa nga magsaka ang category sini halin sa Tropical Depression kag ginabulubanta nga maga sulod ini sang PAR sa palaabuton nga Lunes nga adlaw.
Lauman man nga padayon nga maeksperyensyahan sang Visayas kag Mindanao ang maulanon kag mapanganuron nga paniempo dala sang kalain sang paniempo kag intertropical convergence zone (ITCZ).
