KORONADAL CITY – Nagpalab-ot sang pagpakig-unong ang buluthoan sang isa ka Grade 2 pupil makaligad ini nga mapatay matapos mahulog sa suba kag natuslok sang taliwis nga bahin sang kahoy ang parte sang lawas sini sa banwa sang Norala, South Cotabato.
Ginkilala ni Richard Padernal, ang principal sang Lower Tinago Elementary School sa nasambit nga banwa ang biktima nga si ‘alyas Jast’, 8 anyos.
Sa pagsaysay sini sa Bombo Radyo Koronadal, nagahampang lamang ang biktima sa suba kag wala nakit-an ang malaba kag taliwis nga kahoy bangud sa mabaskog nga ilig sang tubig kag sa iya paglumpat natuslok ang kilikili sini sa nasambit nga kahoy.
Gilayon nga gintawag sang utod sini nga lalaki ang ila lola agud mabuligan ini nga makakas sa kahoy, apang naubosan na sang dugo samtang ginadangat sa ospital nga nangin rason sang kamatayon sini.
Tuman nga kasubo kag pagtalangison ang nabatyagan sang pamilya sang biktima makaligad ang panghitabo.
Nakahanda naman si Norala Mayor Clemente Fedoc nga buligan ang pamilya sang namatyan.
