Nakahan-ay na ang nagkalain-lain nga programa kag aktibidad sang mga Blaan Cultural Communities kag mga Indigenous Peoples (IPs) bilang kabahin sang selebrasyon sang Indigenous Peoples Month sa bulan sang Oktubre.
Ini ang ginpahayag ni Dr. Elizabeth Joy Serrano-Quijano, Blaan writer kag professor, sa interview sang Bombo Radyo Koronadal.
Suno kay Dr. Quijano, kabahin sa mga aktibidad nga ginpreparar ang mental health awareness agud mapasaka ang kaalam sang komunidad tuhoy sa importansya sang kahimsog sa panghunahuna kag emosyonal nga kaayuhan.
Ginpaathag man niya nga ang mga programa kag selebrasyon indi lang para sa mga katutubo, kundi bukas para sa tanan nga sektor sang komunidad, relihiyon ukon ethnicity.
Paagi sa sini nga mga aktibidad, ginahatagan sang kahigayunan ang nagkalain-lain nga grupo nga makapakigbahin, makatuon sa kultura kag tradisyon sang mga Indigenous Peoples, kag mapabakod ang paghangop kag pagtahod sa ila identidad kag kinamatarong.
Ginalauman nga paagi sa selebrasyon, dugang nga mapauswag ang pagpakig-angot kag pagbinuligay sang nagkalain-lain nga sektor, samtang padayon nga ginapabaskog ang pagpreserbar sang kultura kag panublion sang mga katutubo.
