Koronadal City- Makipag angot ang pila ka mga alkalde sang banwa sang South Cotabato sa Department of Health kag Department of Education angot sa pagkanselar sang pila ka mga pyesta bangud sa pamahog sang novel coronavirus kag african swine fever.
Sa interbyu sang Bombo Radyo Koronadal kay T-boli Mayor Dibu Tuan, nakipag angot siya kay Governor Reynaldo Tamayo Jr kag natalana nila nga paga istoryahon ang DepEd agud masolbar ang nasambit nga problema.
Dugang pa ni Mayor Tuan, madugay na suno pa nila gina preparahan kag gingasyuhan ang ila pyesta rason nga luyag nila mabal-an kun ano ang mangin kasiguraduhan sang DepEd kag DOH kun paano ini madayon.
Suno sa alkalde, mangin apektado ang ginpreparahan nila nga street dancing, mass demo, kag iban pa nga dapat makit-an saila pyesta.
Samtang suno naman kay Surallah Mayor Tony Bendita, naghangyo ini kanday Mayors Tuan, Albert Palencia sang Banga kag Clemente Fedoc sang Norala nga ipa iway anay ang ila tagsa tagsa ka pyesta agud indi malatnan ang mga estudyante sang gakalapta nga balati-an.
Dugang pa sang alkalde, gakadapat suno pa nga unahon ang kahimtangan sang mga estudyante.
