Temporaryo nga isasarado ang pila ka porsyon sang mga dalanon sa Koronadal City bilang preparasyon sa mga aktibidad para sa ika-26 nga Charter Anniversary kag Negosyo Festival.
Suno kay Joy Placer, hepe sang City Traffic Management Office, sakop sang road closure ang palibot sang public market kag pila ka porsyon sang Osmeña, Morrow kag Antipolo Streets.
Ipatuman ang pagsira sang dalanon halin alas-4 sang hapon tubtob ala-1 sang kaagahon agud mapahagan-hagan ang traffic congestion kag masuportahan ang hapsay nga pagpatigayon sang mga aktibidad.
Naka-standby naman ang traffic personnel sa mga apektado nga lugar para magmonitor sang dalagan sang trapiko kag magpatuman sang safety measures.
Gina-awhag ni Placer ang mga motorista kag publiko nga magplano sang ila byahe, mag-adjust sang ila ruta kag magsunod sa mga traffic advisory sang otoridad.
