Ginasapinal na sang Department of Health (DOH) ang pag-obra sang procurement o pagbakal sang flu vaccine para sa trankaso.
Base sa pahayag sang DOH, posible nga sa Agosto madala na ang mga bakuna.
Kabug-osan nga singko milyon nga dose ang pagabaklon sang health department para sa paggamit sang mga senior citizen sa aton nga pungsod.
Kon madala na ang mga bakuna, mahimo na ini ihatag sa mga imol nga senior agod mabuligan sila sa pagpanalipod batok sa influenza.
Base pa sa pahayag sang DOH, ang vaccination program para sa mga senior magapadayon hasta sa katapusan sang 2023.
Nahibaluan nga nagsiling na anay ang infectious disease expert nga si Dr. Rontgene Solante sa posibilidad sang pagtaas sang kaso sang influenza humalin sini nga bulan, gani kinahanglan nga madali na ang pagbakal sang flu vaccine para sa mga senior.
Ang pagbakuna sa mga senior sa mas temprano nga tion amo ang makahatag sang proteksyon batok sa maabot nga pagtaas sang sakit halin Agosto tubtob Disyembre.
