Ginkontra nanday House Assistant Majority Leaders Pammy Zamora sang Taguig City, Zia Alonto Adiong sang Lanao del Sur, kag Jay Khonghun sang Zambales si Bise Presidente Sara Duterte may kaangtanan sa iya pahayag nga wala niya ginbanta ang kabuhi nanday Presidente Ferdinand Marcos Jr., First Lady Liza Marcos, kag Speaker Martin Romualdez.
Ginkabalak-an nanday Zamora, Adiong, kag Khonghun, nga mga lider sang Young Guns sa Kamara, ang pagpanginwala ni Duterte sa iya mismo nga ginsiling sa isa ka online press conference, diin iya ginpahayag nga may nakaistorya siya nga magapatay kanday Presidente Marcos, First Lady Liza Araneta-Marcos, kag Speaker Ferdinand Martin Romualdez kung may matabo sa iya.
Sa isa ka pahayag, ginpanginwala ni Duterte nga may ginbanta siya batok sa Presidente.
Suno kay Zamora, ang dason nga pagbaliskad ni Duterte amo ang desperado kag baluktot nga tikang agud burahon sa hunahuna sang publiko ang iya ginsiling.
Para naman kay Adiong, dapat nga seryosuhon ang pahayag ni Duterte bilang isa ka matuod nga hulga sa seguridad sang pungsod kag kinahanglan sang madali nga imbestigasyon.
Ginpahayag man ni Adiong nga ini indi ang unang higayon nga ginpanginwala ni Duterte ang iya mga ginhimo. Suno sa iya, makadamo na nga ginalikawan sang Bise Presidente ang pagbaton sang iya responsibilidad—gikan sa pagpanginwala sang pagpahamtang kung paano nagastu ang P125-milyon nga confidential fund sulod sang 11 ka adlaw, tubtob sa paghatag sang palusot sa iligal nga pagbalhin sang pondo sang DepEd kag OVP.
