Nanawagan si Cabinet Secretary Benjamin “Benhur” Abalos Jr. sang mas istrikto nga pag-regulate sa paggamit sang social media sang mga kabataan sa Pilipinas.
Sa interview sang Bombo Radyo Koronadal, ginpahayag ni Abalos nga isa ini sa mga dapat tutukan sang mga eskwelahan kag eksperto agud mabuligan ang mga kabataan nga makilala ang nagakaigo kag indi nagakaigo nga content sa online platforms.
Suno sa iya, importante ang guidance kag regulation bangud mahimo maimpluwensyahan ang mga kabataan sang makahalalit nga content nga posible magduso sa ila sa paghimo sang indi maayo nga mga aksyon.
Ginpabutyag man ni Abalos nga mahimo ikonsiderar ang isa ka classification system para sa social media content nga kaangay sang ginapatuman sa mga pelikula kag programa sa telebisyon paagi sa Movie and Television Review and Classification Board ukon MTRCB.
Apang, ginpabutyag niya nga kinahanglan ini pagtuunan sang mga eksperto agud mahibaluan kon ano nga mga mekanismo ang epektibo sa pag-monitor kag pagprotektar sa mga kabataan online.
Para kay Abalos, ang mas klaro nga regulation kag guidance sa social media mahimo mangin kabahin sang mga tikang para maprotektahan ang kabataan batok sa content nga indi angay para sa ila edad.
