Tuman ka pit-os sa subong ang na-eksperyensiyahan sang tricycle driver diri sa syudad sang Koronadal bangud naman sa pagsaka sang presyo sang gatong kag ginalakipan man sang madasig nga pagsaka sang presyo sang pagkaun.
Sa interview sang Bombo Radyo Koronadal kay manong Arnel Elarcosa- Tricycle Driver sa syudad ginpahayag sini nga tuman pagid sa subong ang kapigaduhon nga ila nabatyagan bangud pati isda nga ila masami nga ginabakal ang nagsaka man ang presyo bangud apektado man ang kita sang mga manugpangisda sa dagat.
Ginpakigbahin man sini nga masami nga wala man sila naga libot agud nga magpamasda bangud magasto sa gasolina kag sa baylo naga hulat na lamang ang mga ini sa ila nga tornohan sang pasahero agud nga makakinot man sang gatong.
Nagahangyo man ini sa pila ka mga pasahero nga kun mahimo, magdugang man sang pamasahe nga kabubut-on lang nila kay dako man nga bulig ini sa ila na mga tricycle drivers bangud man sa kapit-os nga ila man na-eksperyensiyahan.
Naga dahom man ini nga magnubo ang presyo sang gatong bangud kun magsaka pa ini sa P100 per liter, mabudlyan gid sila nga magpangita ka pamaagi sa pagpangabuhi pinaagi sa pagbiyahe//
