Ginpakigbahin sang aktres nga si Shuvee Etrata ang iya kalipay matapos niya mapatuman ang iya ginatawag nga “American dream” paagi sa pagbisita sa United States.
Nagpost si Etrata sang laragway nga nagapakita sa iya nga nagapose sa atubangan sang kilala nga Hollywood Sign sa Los Angeles.
Naglakat sa Amerika si Etrata agud iselebrar ang iya kaadlawan sa Hunyo 4.
Nagpahayag man ang aktres sang emosyon bangud sa mga nabatyagan niya nga mga kadalag-an subong nga tuig.
Suno sa iya, proud siya nga nakalab-ot na siya sa punto nga makakadto sa Amerika, samtang natapos man ang balay sang ila pamilya sa Polomolok, South Cotabato, kag nakabakal siya sang mga kinahanglanon sang iya pamilya.
Dugang pa ni Etrata, madamo man siya sang gin-agyan nga mga pagtilaw sa kabuhi sa sini nga tuig gani luyag niya nga mahatagan man sang tiyempo ang iya kaugalingon agud mas makapadayon pa sa iya trabaho kag karera.
