Nagpahayag ang anay defense lawyer sa impeachment trial ni anay Chief Justice Renato Corona nga si Atty. Tranquil Salvador nga ang Senate impeachment court lang ang makadesisyon kun husto ang direksyon kag taktika nga ginasunod sang depensa ni Vice President Sara Duterte.
Ini ang iya pahayag matapos siya mapamangkot kin ngaa wala ginpamatud-an ukon ginpanginwala sang defense panel ang kontrobersiyal nga mga pahayag ni VP Sara batok kanday President Ferdinand Marcos Jr., First Lady Liza Araneta-Marcos, kag anay House Speaker Martin Romualdez.
Ginpamangkot man siya kun ngaa nagapokus ang depensa sa mga typographical errors sa mga dokumento imbes nga pamatud-an ang inosensya sang bise presidente.
Suno kay Salvador, mahimo nga ginatinguhaan sang depensa nga ipakita ang konteksto sang mga pahayag ni VP Sara kag nga wala ini nagahimo sang aktuwal nga pagpamahog.
Apang ginpasiguro niya nga ang paghusgar kun epektibo ukon nagakaigo ang estratehiya sang depensa yara gihapon sa kamot sang mga senator-judge, nga amo man ang magadesisyon sa merito sang kaso.
