Ginrespeto ni defense spokesperson Atty. Michael Poa ang desisyon sang House prosecution nga indi na pagpadayunon ang Article III sang impeachment complaint batok kay Bise Presidente Sara Duterte, nga nagaangot sa ginapatihan nga pagpang-bribe.
Suno kay Poa, yara sa prerogatibo sang prosecution ang pagdesisyon kon ipadayon ukon biyaan ang isa ka artikulo sang impeachment complaint.
Sang ginpamangkot kon makabig ini nga “small win” ukon dyutay nga kadalag-an para sa depensa, nagdumili si Atty. Poa nga tawgon ini nga kadalag-an.
Ginpaathag niya nga indi nila gusto nga angkonon ang kredito sa amo nga desisyon, bangud ang House prosecution mismo ang nagdesisyon nga indi na pagpadayunon ang nasambit nga artikulo.
Sa pihak sini, padayon nga ginatutokan ang proseso sang impeachment complaint batok sa bise presidente, samtang ginahulat ang dugang nga mga tikang sa sini nga kaso.
