Wala pa sang ginreport nga napatay ukon napilasan sa Panama City matapos ang magnitude 7.7 nga pagtay-og sang Biyernes.
Sa interview sang Bombo Radyo Koronadal kay Chloe Gonzalez, Bombo International News Correspondent to Panama, ginpahayag niya nga wala pa sang nai-report nga casualties sa Panama City, kun sa diin siya nagaestar, bisan pa sa mabaskog nga pagtay-og.
Suno kay Gonzalez, tuman ang ila kahadlok bangud yara sila sa ika-12 nga panalgan sang building sang natabo ang linog.
Dugang pa niya, nakabatyag sila liwat sang mga aftershock samtang nagapadayon ang interview sang Bombo Radyo.
Samtang, padayon ang search and rescue operations sang mga otoridad agud mahibaluan ang kabug-usan nga numero sang mga napilasan ukon napatay, lakip ang kadakuon sang halit nga gintuga sang linog.
