Ginpasiguro ni Department of the Interior and Local Government (DILG) Secretary Jonvic Remulla nga wala sang special treatment nga mabaton si Senator Jinggoy Estrada kag iban pa nga akusado sa ginalaegar nga P537 million flood control corruption scandal.
Suno kay Remulla, magapaidalom si Estrada sa kasubong nga proseso nga ipatuman sa tanan nga tawo nga yara sa kustodiya sang kapulisan, lakip ang booking procedures, fingerprinting, mugshots, kag medical examination.
Madumduman nga ginarestar si Estrada sa sulod sang Senado matapos iserbi sang mga awtoridad ang warrant of arrest nga ginpaguwa sang Sandiganbayan kaangot sang kaso nga plunder nga ginpasang-at sang Office of the Ombudsman.
Samtang, ginbuyagyag ni Remulla nga nabinaisay sila ni Senate President Alan Peter Cayetano samtang ginpatigayon ang pagarestar.
Suno kay DILG Secretary Jonvic Remulla, ginpanindugan ni Senador Alan Peter Cayetano nga indi dapat dakpon ang isa ka senador sa sulod sang Senado kag kinahanglan anay ini nga mapaguwa antes ipatuman ang warrant of arrest.
Apang, suno kay Remulla, wala sang nagapadayon nga layi nga nagadumili sa mga otoridad nga magpatigayon sang pagdakop sa sulod sang Senado.
Matapos ang mga kinahanglanon nga proseso sa Camp Crame, gindala si Estrada sa Sandiganbayan para sa masunod nga mga legal nga tikang sa iya kaso.
Lakip man sa warrant of arrest sanday anay DPWH Secretary Manuel Bonoan kag iban pa nga mga respondent sa kaso, nga suno sa DILG, na-account na sang mga otoridad.
