Nagbisita si Russian President Vladimir Putin sa Kursk sa unang higayon halin sang gindeklarar sang Moscow nga ila na liwat nga nakuha ang rehiyon matapos ang wala ginpaabut nga pagsalakay sang pwersa sang Ukraine sang nagligad nga tuig.
Base sa report sang state media sang Russia, nakigkita si Putin sa mga municipal leaders sa syudad sang Kurchatov kag nagbisita sa Kursk nuclear power plant nga subong ginatukod pa.
Sa ginpabutyag nga video footage, makit-an si Putin nga nagsuksok sang suit kag nagahambal sa mga local volunteer.
Ginpahayag man ni Putin nga padayon gihapon ang paninguha sang pwersa sang Ukraine nga magluntad pa-tabok sa border sang Russia.
Ginpahanugot ni Putin ang pagdugang sang demining units sa Kursk agud mabuligan ang mga residente nga na-displace nga makabalik sa ila tagsa ka panimalay.
Madumduman, una na nga ginpahayag ni Putin sang nagligad nga bulan nga nakuha na liwat sang ila pwersa ang Kursk kag upod pa nila ang mga sundalo halin sa North Korea sa pag-away agud mabalik sa ila ang amo nga teritoryo.
