Uminit ang tensyon sa Senate of the Philippines matapos kuwestyunin ng minority bloc ang umano’y pagmamadali sa panukalang inihain ni Rodante Marcoleta na payagan ang mga senador na dumalo at makaboto sa sesyon sa pamamagitan ng teleconference kung may sapat na dahilan.
Naging sentro ng diskusyon ang posibilidad na magamit umano ang online voting upang mapaboran ang ilang miyembro ng majority bloc na nahaharap sa iba’t ibang kontrobersiya at kaso.
Nagpakita rin ng pagkainis si Erwin Tulfo sa umano’y mabilis na pagtalakay sa mosyon, kasabay ng kaniyang pagtatanong kung may partikular na layunin sa likod nito. Iniuugnay ito sa naging pahayag ni Jesus Crispin Remulla na magsasampa ng kasong plunder laban kay Jinggoy Estrada kaugnay ng umano’y multi-bilyong flood control scandal.
Ayon pa sa mga ulat, posible ring maharap sa kaparehong kaso si Joel Villanueva dahil sa umano’y pagkakadawit sa kickback scheme sa mga proyekto. Samantala, iniimbestigahan din umano si Marcoleta kaugnay ng alegasyong pagtanggap ng P75 milyong campaign donations noong 2025 elections.
Kabilang din sa mga usaping ibinabato sa majority bloc ang muling pagtatago umano ni Ronald dela Rosa kaugnay ng arrest warrant ng International Criminal Court.
Sa kabila nito, iginiit ni Marcoleta na napapanahon ang kaniyang panukala dahil sa pag-usbong ng makabagong teknolohiya. Aniya, kung pinapayagan ang online voting para sa mga Overseas Filipino Workers tuwing eleksyon, maaari rin itong ikonsidera sa Senado.
Mariin namang tumutol ang minority bloc sa mungkahi. Ayon kay Risa Hontiveros, hindi pa umano napag-uusapan nang maayos ang laman ng mosyon ngunit nais na agad itong dalhin sa plenaryo. Iginiit naman ni Sherwin Gatchalian na pinapayagan lamang ang teleconference sessions sa panahon ng national emergency o pandemya kaya’t hindi dapat basta amyendahan ang rules ng Senado.
Samantala, inalala rin ng ilang senador ang naging kahalintulad na sitwasyon noon kay dating senador Leila de Lima, nang hindi payagan ng korte na makadalo siya sa sesyon sa pamamagitan ng online platform habang nakakulong.
Kasabay nito, iginiit naman ni Imee Marcos na tila isa-isang pinupuntirya ang 13 miyembro ng majority bloc dahil sa sunod-sunod na umano’y “case buildup” laban sa kanilang hanay.
Ayon kay Marcos, may mga natatanggap umano silang impormasyon mula sa mga tauhan ng Office of the Ombudsman, Department of Justice, at National Bureau of Investigation tungkol sa mga reklamong inihahanda laban sa ilang senador.
Kabilang sa mga pangalang binanggit ng senadora na umano’y nahaharap sa mga reklamo sina Marcoleta, Estrada, Villanueva, Francis Escudero, at magkapatid na sina Camille Villar at Mark Villar.
Binanggit din niya sina dela Rosa at Bong Go kaugnay ng mga usaping konektado sa imbestigasyon ng ICC sa war on drugs ng administrasyon ni dating Pangulong Rodrigo Duterte.
Sa gitna ng umiinit na tensyon sa Senado, sinabi ni Marcos na umaasa siyang hindi mauuwi sa umano’y pamumulitika o persecution ang mga kasong iniuugnay sa kanilang grupo.
