Nagakadapat nga magdugang sang mga barko sang Pilipinas sa ginaagawan nga mga territoryo sang Pilipinas kag China.
Ini ang nangin pahayag ni Mr.Denmark Suede- Bombo International Correspondent to Australia sa interview sang Bombo Radyo Koronadal.
Suno sa iya, nagakaangay nga magdugang sang barko ang Pilipinas agud suno pa nga maghagan-hagan ang tension sa bahin sang West Philippine Sea (WPS).
Dugang pa sini, indi kinahanglan sang Pilipinas nga magbalos sa kun anu man nga ginahimo sang China Coast Guard bangud mahimo nga mangin pamaagi pa ini nga mas magsaka pa ang tension sa tunga sang duha ka pungsod.
Liwat ginpanindugan sang Philippine Navy ang kinamatarong sang pungsod Pilipinas nga i-mentinar ang BRP Sierra Madre nga nakasadsad sa Ayungin Shoal sa West Philippine Sea (WPS).
Suno kay Philippine Navy spokesperson for the West Philippine Sea Commodore Roy Trinidad, bilang commissioned vessel sang Pilipinas, may mandato ang mga ini nga i-maintain kag indi pagpabay-an ang amo nga barko.
Nahibaluan nga 1999 pa yara nakasadsad ang BRP Sierra Madre sa Ayungin Shoal. Nagatiner diri ang dinosena nga marines kag nagaserbi nga simbolo sang soberanya sang Pilipinas sa West Philippine Sea.
Sa pihak sini padayon nga ginapanindugan sang China nga kakson ang amo nga barko sa lugar nga ginatawag sang mga ini nga Ren’ai Jiao.
