Gin-aprubahan sang Senado sa ikatlo kag katapusan nga pagbasa, sa botong 13-5-0, ang Senate Bill No. 2387 nga nagatakda sang lima ka tuig nga termino sang mga opisyal sang Barangay kag Sangguniang Kabataan (SK).
Bangud sa hagna nga gin-file ni Senator Francis “Chiz” Escudero, magabag-o ang electoral cycle kag ipagpaliban ang nakatalana nga Barangay and Sangguniang Kabataan Elections (BSKE) halin Nobyembre 2026 pakadto sa Nobyembre 2028.
Suno kay Escudero, tuyo sang hagna nga magpatukod sang mas klaro kag organisado nga sistema sa lokal nga pagdumala kag malikawan ang balik-balik nga pagpaliban sang BSKE kun nagakasabay ini sa national elections.
Apang, gin-oppose ini sang pila ka senador, lakip sanday Senator Tito Sotto kag Joel Villanueva.
Suno sa ila, posible nga maglapas sa probisyon sang Saligang Batas ang liwat nga pagpaliban sang BSKE kag mahimo man nga mausik ang halos P8 bilyon nga gin-gasto na sang Commission on Elections (Comelec) para sa pagpanghanda sa eleksyon subong nga tuig.
Samtang, nakapasa na man sa ikatlo nga pagbasa sa House of Representatives ang kapareho nga hagna ukon House Bill No. 10971.
Sunod sini, pagadalahon ang duha ka bersyon sa bicameral conference committee para ma-isa ang mga probisyon antes isumiter sa Malacañang para sa pirma ni Pangulong Ferdinand Marcos Jr.
