Ginkumpirmar ni Koronadal City Mayor Erlinda Araquil nga halin sa 31 ka bag sang bugas nga nauna nga ginreport nga nadula sang Lunes, nachekyar nga 22 lang ang nadula matapos ang pag-isip kag maid-id nga pag-account sang stocks sa warehouse sang City Hall.
Suno sa alkalde, nag-ako sa iya ang anay 12-tuig nga job order employee sang City Hall nga siya ang nag-abri kag nagsulod sa warehouse matapos nga indi na na-renew ang iya kontrata.
Suno sa pagpaathag sang anay empleyado, nagbalik siya sa City Hall matapos indi na ma-renew ang iya kontrata kag naghulam sang susi sa duha ka empleyado nga may uyat sini.
Ginpahayag man niya nga gin-duplicate niya ang susi, apang wala niya gin-ako nga siya ang nagkuha sang bugas nga ginreport nga nadula.
Sa karon, padayon ang imbestigasyon sang mga otoridad, lakip ang pag-review sang CCTV footage agud matukiban kon may iban pa nga insidente nga natabo sa warehouse.
