Naghimo sang bag-o nga mga alegasyon ang mga anay bodyguards ni anay Ako Bicol Party-list Representative Zaldy Co matapos ginhingadlan ang iban pa nga opisyal sang gobyerno kag media personalities nga ginpahayag nakabaton sang kwarta halin sa anay mamalidha.
Sa press conference kahapon nga adlaw, Hunyo 16, ginpahayag sang abogado sang grupo nga si Atty. Levi Baligod, nagpakilala sang apat ka bag-o nga testigo.
Ginpahayag sang isa sa ila nga involved siya sa pagdul-ong sang mga maleta nga ginaalegar para kay anay House Speaker Martin Romualdez kag Senador Erwin Tulfo.
Gin-angot man sang self-proclaimed “bag-men” ni Co ang Commission on Elections (COMELEC) Chairperson George Garcia, Chairman George Garcia sa gina-alegar nga pagbaton sang kwarta. Apang hugot ini nga ginpanginwala ni Garcia kag gintawag nga kabutigan ang mga alegasyon.
Suno naman sa isa pa ka anay aide, gin-alegar nga gindeliver nila ang apat ka maleta nga may unod nga kwarta sa balay ni Senador Francis Escudero.
Ginpakita man sang mga testigo ang pila ka mga litrato nga suno sa ila may kaangtanan sa ila mga pahayag.
Lakip diri ang litrato nanday Senador Kiko Pangilinan kag Sharon Cuneta kaupod ang pila ka staff ni Co.
Apang wala sila naghatag sang detalye kon paano ini may kaangtanan sa ila mga alegasyon.
Sa pihak nga bahin, ginbasura naman ni Cuneta ang pahayag sang anay bodyguard ni Co kag ginpahayag nga lunsay kabutigan ang mga alegasyon batuk sa ila.
Ginpakita man nila ang litrato kaupod ang MMDA General Manager kag anay PNP Chief Nicolas Torre. Suno sa ila, ini ang ginkuha sang gina-engganyo sila nga i-retract ang ila nauna nga mga pahayag sa senado.
Samtang, ginpahayag man sang mga anay bodyguards nga nagdeliver sila sang paper bags nga may unod nga kwarta sa pila ka mga media personalities nga ginalakipan sang TV journalist nga si Arnold Clavio kag columnist nga si Mon Tulfo.
Gilayon ini nga ginpanginwala ni Clavio kag ginhangkat ang mga nag-akusar nga magpresentar sang ebidensya.
Samtang, ginkadlawan lang ni Mon Tulfo ang alegasyon kag ginkwestyon kun paano makasulod sa isa ka paper bag ang kaangay kadamo nga kantidad sang kwarta.
