Ginpasiguro sang Provincial Disaster Risk Reduction and Management Office (PDRRMO) ang padayon nga preparasyon sang mga responder samtang nagapadayon ang pag-ulan sa pila ka lugar sa probinsya.
Suno kay PDRRMO Head Rolly Doane Aquino sa interview sang Bombo Radyo Koronadal, nakaalerto na ang mga disaster response teams halin sa nagkalain-lain nga banwa, Koronadal City, kag ang provincial office para magresponde sa posible nga emerhensiya.
Ginlaygayan ni Aquino ang mga residente, ilabi na ang yara malapit sa mga suba, bahaon nga lugar, kag mga lugar nga delikado sa landslide, nga maglikaw sa peligro kag magbakwit gilayon kun kinahanglan bisan wala pa sang opisyal nga mando.
Dugang pa niya, nagapadayon ang koordinasyon sang mga opisyal sang barangay, banwa, kag probinsya agud mapadasig ang pagresponde kag pagbulig sa mga lugar nga apektado sang mabaskog nga ulan.
Nagahatag man ang provincial government sang dugang nga suporta, lakip ang gatong para sa mga kagamitan sang LGUs sa clearing operations kag pagtinlo sang mga dalan nga apektado sang malain nga panahon.
