Ginpaidalom na sa lockdown sang Isulan Municipal Police Station (Isulan MPS) ang Isulan National High School sa Barangay Kalawag 1, Isulan, Sultan Kudarat, samtang ginahimo sang mga awtoridad ang nagakaigo nga safety procedures kag ginaberipikar ang insidente nga naghatag sang kahadlok kag kabalaka sa mga estudyante kag manunudlo subong nga Miyerkules, Setyembre 30, 2026.
Gilayon nga nagresponde ang mga awtoridad matapos makabaton sang report parte sa insidente nga nagluntad sa sulod sang buluthuan sang mga alas-10:26 sang aga. Padayon nga gina-secure ang lugar samtang ginapang-usisa ang eksakto nga ginhalinan sang nabatian nga mabaskog nga paglupok.
Suno kay Isulan Mayor Bai Rihan Mangudadatu Sakaluran, yara gihapon sa idalom sang kontrol sang Philippine National Police (PNP) ang buluthuan samtang nagapadayon ang imbestigasyon. Wala man sang na-report nga casualty ukon may napilasan may kaangtanan sa insidente.
Nagatutok ang imbestigasyon sa nabatian nga ginapatihan nga paglupok sang isa ka butang nga wala pa matumod. Sa inisyal nga report, wala suno pa sang nakita nga basyo sang bala sa sulod sang buluthuan. Padayon nga ginapangita sang mga awtoridad ang ginhalinan sang mabaskog nga paglupok nga nagtuga sang panic, kahadlok kag kabalaka sa mga estudyante kag manunudlo.
Samtang, ginkumpirmar sang isa ka manunudlo sang nasambit nga buluthuan nga wala sang nagluntad nga hostage-taking incident sa sulod sang eskwelahan. Ginpasiguro man niya nga luwas ang tanan nga kabataan kag manunudlo sa sulod sang buluthuan.
Kaangot sini, ginpahayag ni Kahar Dalaten, Chief of Staff ni Sultan Kudarat Governor Datu Pax Mangudadatu, ang pagresponde sang mga awtoridad sa insidente. Ginpahanumduman man niya ang mga kabataan kag estudyante nga indi paghimuon nga lahog-lahog ang paggamit sang mga paputok pareho sang piccolo kag triangle, ilabi na sa sulod sang buluthuan, bangud mahimo ini magresulta sa kahadlok, kagamo kag peligro sa seguridad sang mga estudyante kag manunudlo.
Samtang, ginpahayag sang Lokal nga Gobyerno sang Isulan nga gin-suspend na ang tanan nga klase sa tanan nga lebel sa tanan nga mga eskwelahan sa banwa sang Isulan sugod sini nga hapon, Miyerkules, Setyembre 30, 2026, tubtob sa sunod nga pahibalo ukon “until further notice.”
Sa pihak nga bahin, gin-awhag ni Mayor Sakaluran ang publiko nga magpabilin nga kalmado kag likawan ang pagpalapta sang sala ukon indi beripikado nga impormasyon samtang nagapadayon ang imbestigasyon.
Padayon nga gina-secure sang Isulan MPS kag iban pa nga nagakaigo nga awtoridad ang buluthuan samtang ginahimo ang imbestigasyon kag beripikasyon.
Ginapaalintunan ang mga ginikanan kag guardian nga magsalig lamang sa opisyal nga mga pahayag kag advisory halin sa Isulan Municipal Police Station, Philippine National Police, Lokal nga Gobyerno sang Isulan, kag iban pa nga beripikado nga sources.
