Nagpanawagan si President Ferdinand Marcos Jr. sa Kongreso nga gilayon nga amyendahan ang Electric Power Industry Reform Act (EPIRA) agud madula ang system loss charge nga ginapas-an sang mga konsyumer sa ila binulan nga bayranan sa kuryente.
Sa iya ikalima nga State of the Nation Address (SONA), ginpahayag ni Marcos nga kinahanglan tagaan sang solusyon ang panawagan sang publiko nga mapanubo ang mataas nga presyo sang kuryente sa pungsod.
Suno sa Presidente, indi dapat ipasa sa mga konsyumer ang system loss bangud wala sila sang responsibilidad sa pagkadula sang kuryente samtang nagalabay ini sa transmission kag distribution system.
Ginpangabay niya ang Kongreso nga amyendahan ang EPIRA agud mapunggan ang pagpangolekta sang system loss charge, lakip na ang value-added tax (VAT) nga ginapahamtang sini.
Ang EPIRA ukon Republic Act No. 9136 amo ang layi nga nagreporma sa industriya sang kuryente sang 2001 kag nagatugot sa pila ka system losses nga ipasa sa mga konsyumer.
Ginhatagan man ni Marcos sang suporta ang hagna nga “Sariling Kuryente” Act nga nagatinguha nga himuon nga mas hapos kag mas barato ang pagbutang sang rooftop solar panels kag battery storage systems sa mga panimalay.
Suno sa iya, makabulig ini sa paghatag sang dugang nga alternatibo nga ginhalinan sang kuryente sa gastuhon sang mga Pilipino sa ila bayranan sa kuryente.
