Gin-insister sang defense counsel nga si Atty. Justin Nicol Gular ang mga exemption sa idalom sang Section 42 sang Revised Corporation Code nahanungod sa indi pagdeklara sang dividends sang isa ka korporasyon.
Sa cross-examination kay Securities and Exchange Commission ukon SEC witness Gerardo Del Rosario, ginpamangkot ni Gular kon ginadumilian bala sang kasuguan ang indi pagdeklara sang dividends.
Ginkumpirmar ni Del Rosario nga indi mismo ginadumilian ang indi pagdeklara sang dividends, apang may probisyon batok sa pag-retain sang surplus profits nga sobra sa 100 porsyento sang paid-in capital, nga may yara sang mga exemption.
Lakip sa mga exemption ang definite expansion projects ukon programs nga gin-aprubahan sang board of directors, loan restrictions nga nagadumili sa pagdeklara sang dividends kun wala sang pagtugot sang creditors, kag special circumstances nga nagakinahanglan sang retention sang earnings, kasubong sang pagbutang sang special reserve para sa posible nga contingency.
Ginkumpirmar man sang testigo nga ang nagapadayon nga litigation sang isa ka korporasyon mahimo kabigon nga special circumstance.
Suno kay Del Rosario, kinahanglan man nga i-report sa audited financial statements ang paggamit sang amo nga mga exemption.
