Ginalauman ang posible nga pagnubo sang ranking sang Pilipinas sa corruption perception index bangud sa madalom nga imbestigasyon nga ginapatigayon sang gobyerno may kaangtanan sa ginpahayag nga maanomalya nga flood control projects sa pungsod.
Sa press briefing sa Malacañang, ginpahayag ni Palace Press Officer Usec. Atty. Claire Castro nga kabahin ini sang pagpaninguha sang administrasyon ni Pangulong Ferdinand Marcos Jr. nga buksan kag usisaon ang isyu sang korapsyon sa mga proyekto sang gobyerno, lakip na ang flood control kag iban pa nga mga imprastraktura.
Dugang pa niya, ang mga tikang kag pagpanikasog sang administrasyon nagapakita sang handum sang Pangulo nga tinluan ang ginbilin nga mga problema sang nagligad nga mga administrasyon.
Base sa pinakabag-o nga corruption perception index report, nakakuha ang Pilipinas sang score nga 32/100, isa ka puntos nga mas manubo kun ikumpara sang nagligad nga tuig.
