Wala pa sang impormasyon sa subong si Department of the Interior and Local Government (DILG) Secretary Jonvic Remulla kun may ginpagwa na nga arrest warrant sang International Criminal Court (ICC) batok kay Senador Ronald “Bato” Dela Rosa.
Ini ang sabat sang kalihim matapos nga nagluntad ang mga datos subong nga Sabado, Mayo 9, angot sa gina-alegar nga ginpagwa na nga warrant ang international tribunal.
Suno kay Remulla, samtang wala pa niya nakit-an ang opisyal nga kopya sang nasambit nga warrant, ini hearsay pa lamang.
Gindugang man sang kalihim nga kasamtangan nagapreparar ang DILG sang 10,000 ka task force para sa dragnet operations kun matuod nga ipaguwa ang warrant of arrest batok sa senador.
Samtang, ginpahayag man ni Remulla ang kasamtangan nga lokasyon ni Dela Rosa, nga suno sa iya, yara sa Davao Region.
Nauna nga ginpangalanan si Dela Rosa bilang isa sa mga co-perpetrators ni anay Presidente Rodrigo Duterte sa kaso sang war on drugs.
Base sa dokumento nga nagalista sang mga kaso nga ginsumiter sang Prosecution, may yara nga “common plan” si Duterte kaupod ang iya mga co-perpetrators para i-neutralize ang mga ginakabig nga kriminal paagi sa bayolente nga krimen, lakip na ang pagpatay.
Madumduman nga nagserbi si Dela Rosa bilang PNP Chief sang ginlunsyar ni FPRRD ang kontrobersyal nga kampanya batok sa iligal nga droga paagi sa Oplan Tokhang kag Oplan Double Barrel Reloaded.
