Nagapadayon ang pagpaabot sang mabaskog nga pag-ulan sa pila ka bahin sang Luzon subong nga Lunes bangud sa ginpabaskog nga Southwest Monsoon ukon Habagat, suno sa Philippine Atmospheric, Geophysical and Astronomical Services Administration (PAGASA).
Sa 11 p.m. rainfall advisory sang PAGASA, ginpasaka sa orange rainfall warning ang pila ka bahin sang Zambales, Bataan, Pampanga, Bulacan kag Tarlac.
Sa idalom sang orange rainfall warning, ginalauman ang 100 tubtob 200 millimeters nga ulan nga mahimo magtuga sang pagbaha kag landslide.
Samtang, ginpasaka man sa yellow rainfall warning ang Rizal, Cavite kag Metro Manila, lakip ang pila ka bahin sang Nueva Ecija, Tarlac, Batangas, Laguna, Bulacan kag Pampanga.
Sa idalom sang yellow warning, mahimo makabaton ang mga apektado nga lugar sang malawig ukon padayon nga mahinay tubtob katamtaman nga pag-ulan, upod ang talagsa nga mabaskog nga pag-ulan nga mahimo magresulta sa pagbaha kag landslide.
Padayon man nga ginalauman ang pag-ulan sa pila ka bahin sang Quezon, Laguna, Batangas kag Nueva Ecija.//Ginapanugyan sang PAGASA sa publiko, ilabi na sa mga nagaestar sa mababa kag landslide-prone nga mga lugar, nga maglikas gilayon kon kinahanglanon para sa ila seguridad.
