Nagbilin sang isa ka maragtason nga kampanya ang Norala National High School sa katapusan sang T’nalak Festival 2026 matapos makuha ang kampeonato sa Kasadyahan sa Kapatagan, lakip ang Best in Street Parade kag Best in Music.
Suno kay Artistic Director Ronnie Lacuesta sa interview sang Bombo Radyo Koronadal, ang kadalag-an indi lamang bunga sang talento sang halos 190 ka performers, kundi resulta man sang disiplina, mabaskog nga preparasyon kag wala untat nga suporta sang administrasyon, mga maestro, ginikanan, LGU Norala, kag iban pa nga partners.
Bisan nakaatubang sang mga pagtilaw kaangay sang limitado nga oras sa ensayo, epekto sang linog kag kakulang sa pondo, wala ini nakapugong sa grupo nga mapadayun ang ila preparasyon paagi sa pagbinuligay sang tanan nga nagasuporta.
Ginpabutyag man ni Lacuesta nga ang ila champion performance nagapamatuod sang mensahe sang paghiliusa sang Kristiyano, Moro kag Indigenous Peoples, isa sa mga prinsipyo nga ginadala sang T’nalak Festival.
Matapos ang kompetisyon, ginpasalamatan ni Lacuesta ang tanan nga naghatag sang suporta sa kampanya sang Norala National High School, nga nangin kabahin sang ila makasaysayan nga kadalag-an sa T’nalak Festival 2026.
