KORONADAL CITY – Mahimo na nga maagyan sang tawo kag mga salakyan nga naga biyahe ang tulay sa bahin sang Purok Riverside, Barangay Tubi-Ala, Surallah makaligad nga tiphag ang punuan nga parte sini sang naglabay nga adlaw bangud sa pagragasa sang mabaskog nga tubig nga dala man sang pag-ulan sang madugay nga tion bangud sa kalain sang paniempo.
Sa interview sang Bombo Radyo Koronadal kay Mr. Rolly Aquino, PDDRMO sang South Cotabato, ginpahayag sini nga bangud man sang pagpaningkamot kag pag tinguha sang lokal nga pamunuan sang Surallah kag bulig sang probinsiya nabalik na kag nangin passable na ang nasambit nga tulay.
Nahibaluan nga naguba na ini sang una apang nakay-o man kag napangitaan sang paagi.
Dugang pa sini, nga ginaplanohanan na sang nga e-divert ukon e-reroute ang gina-agyan sang tubig para malikawan ang pag-ab-ab sini sa punuan sang tulay nga masami naman nga naga tuga sang pagka-luk-ab sang duta sa kilid sini kag mahugno ang punuan sini.
Una na nga nagpatigayon sang occular inspection ang mga opisyal ang banwa lakip na si Mayor Pedro M. Matinong Jr. sa footbridge nga gin-usar sang mga tawo para makatabok sa nasambit nga tulay.
Ginpasiguro man ni Aquino nga pagatutukan sang ila talatapan ang pagkay-o sang nasambit nga tulay bangud ginpapunduhan na ini sang P5Milyon kag ang padayon nga monitoring sa iban nga mga lugar ilabi na subong nga nagabuhos naman ang mabaskog nga ulan.
