KORONADAL CITY – Patay ang isa ka motorista matapos nga mabunggo sa puno sang Mahogany sa Purok Luzviminda, Brgy. Esperanza, Koronadal City pasado alas-one kagab-i, Biyernes, Agosto 9,2024.
Ini ang ginkumpirmar ni Police Chief Master Sergeant Reynaldo Marcos, Traffic Investigator sang Koronadal City PNP sa interview sang Bombo Radyo Koronadal.
Ginkilala ang biktima nga si Lemuel Tugade Macanas, 29, kasado kag residente sang Purok Waling2, Barangay Pangasinan.
Suno kay Marcos, naguwa sa ila imbestigasyon nga kagab-i pa nadisgrasya ang biktima apang kaina pasado alas-8 sang aga na ini nasapwan nga wala na sang kabuhi sa kanal.
Sandig sa CCTV footage, nagikan sa Barangay Rotonda, Koronadal City ang biktima kag padulong sa barangay Topland sang pag-abot sa lugar sang insidente nag-swerve ini kag nabunggo sa puno nga yara sa kilid sang dalan.
Sa pagbulubanta sang imbestigador mabaskog ang dalagan sang motorsiklo kag head-on-collision ang natabo bangud sa pilas sa ulo sang biktima.
Sa kanal na ini nasapwan bangud sa posible nga pagtabog sini sang nabunggo sa puno sang Mahogany.
Nahibaluan nga ginamaneho sang biktima ang Honda RS color black and white nga motirsiklo.
Samtang, suno naman sa pamilya sini magapauli na kuntani ang biktima apang wala na ini makaabot pa sa ila panimalay.
Sa karon, gindala na sa Cabardo funeral parlor sa Barangay Esperanza ang bangkay sang biktima.
Liwat naman nga nagpanawagan ang mga otoridad sa mga nagamaneho nga maghalong kag siguruhon nga yara sa maayo nga kondisyon samtang nagamanaho agud mangin malayo sa disgrasya.
