Padayon nga ginavalidate sang Police Regional Office 12 ang eksakto nga casualty count kag iban pa nga detalye sang shooting incident sa Banga National High School sa Banga, South Cotabato.
Suno kay PBGEN Alan Manibog, Regional Director sang PRO 12, may mga biktima nga gindala sa mga ospital kag padayon nga ginamonitor ang ila kondisyon.
Ginpahayag ni Manibog nga gin-instruct na niya ang mga concerned police offices kag personnel nga tumanon ang ila tagsa-tagsa ka responsibilidad agud makompleto ang imbestigasyon kag report sa insidente.
Apang wala pa anay gin-confirm sang regional police director ang eksakto nga bilang sang mga napatay kag nasamaran bangud padayon pa ang pag-verify sang mga impormasyon.
Suno sa inisyal nga assessment sang kapulisan, labing menos 10 ang ginakabig nga casualties, lakip ang mga indibidwal nga napilasan bangud sa stampede samtang nagapangita sang luwas nga lugar.
Ginalauman nga matapos ang comprehensive report kag ma-submit ini anay sa PNP National Headquarters antes magpagwa ang PRO 12 sang mas detalyado kag espesipiko nga impormasyon tuhoy sa casualty count.
Samtang, ginapadayon sang kapulisan ang koordinasyon sa school officials kag security personnel para mapalig-on ang police presence sa mga buluthuan kag mapugngan ang posible nga kaangay nga insidente.
May yara man sang memorandum of understanding sa tunga sang kapulisan kag mga eskwelahan para sa mga lecture kag information campaigns nga nagapokus sa seguridad kag prevention sang insidente.
Sa bahin sang armas nga narekober sa crime scene, ginahulat pa ang opisyal nga resulta sang Regional Forensic Unit para matukod ang eksakto nga caliber sini.
Ginhatagan pagtamod man ni Manibog ang responsibilidad sang mga gun owner nga siguruhon nga secured ang ila firearms kag indi ini basta-basta ma-access sang mga kabataan ukon iban nga miyembro sang pamilya.
Ginpahanumdom niya nga dapat indi visible ukon mahapos makuha ang mga armas sa sulod sang panimalay agud malikawan ang posible nga paggamit sini sa mga insidente nga makahalalit sang kabuhi.
Ginduso man sang opisyal ang mga ginikanan nga bantayan ang ila mga kabataan, lakip ang ila mga aktibidad kag engagement sa social media.
