Padayon nga ginadumdom ang papel ni General Paulino Torres Santos Sr. sa pag-organisa sang mga settlement kag paghatag sang oportunidad sa mga pamilya nga magpanguma kag magpundar sang kabuhi sa Koronadal.
Sa interview sang Bombo Radyo Koronadal, ginpahayag ni former Mayor Fernando Miguel nga nangin isa sa mga konsiderasyon sa pagpili ni General Santos sa Koronadal ang kawad-on sang malapad nga hacienda sa lugar, nga naghatag sang kahigayunan sa mga ordinaryo nga pamilya nga makapanguma kag makapuyo diri.
Suno kay Miguel, ginpanguluhan ni General Santos ang pagpanagtag sang duta kag pag-organisa sang mga settlement agud mangin mas organisado ang pag-uswag sang komunidad.
Antes nangin Koronadal Settlement, ginatawag anay ini nga Marbel Settlement.
Kabahin man sang iya mga ginpanguluhan ang pagpalambo sang mga settlement sa Mindanao kag ang pagporma sang una nga lokal nga panguluhan sa South Cotabato.
Bangud sini, ginapanawagan nanday Miguel kag Sueno ang kabataan nga padayon nga tun-an kag dumdumon ang kontribusyon sang mga personalidad nga may dako nga bahin sa kasaysayan sang Koronadal agud mapreserbar ang identidad kag kasaysayan sang syudad.
