KORONADAL CITY -Ginakabig nga eye opener para sa tanan ang natabo nga kamatayon sang isa ka drug suspect nga nagbato sa mga otoridad sa ginpatigayon nga operasyon sa Tandang Sora, Barangay Zone lV, Koronadal City kagab-i.
Ini ang ginpahayag ni Barangay Kapitana Eleonor Borje sa interview sang Bombo Radyo Koronadal.
Suno kay Kapitana Borje, ang napatay nga si Jeffrey Pudadera, yara sa legal nga edad kag residente sang Navarro Street, Barangay GPS ang makaapat na nga nadakpan bangud sa pagbaligya sang illegal nga droga.
May pamatuod suno pa nga nagbato sa operating team si Pudadera kag naigo ang isa ka PDEA agent nga amo ang nagtulod sa mga ini nga tiruhon man ang suspek.
Bangud sa engkwentro nag-angkon sang malala nga igo sa ulo ang suspek nga gintunaan sang kamatayon sini.
Nakuha sa posisyon ni Pudadera ang anum ka pakete sang ginapatihan nga shabu nga may market value nga Php100,000; buy-bust money, isa ka unit sang caliber 9mm, 12 live ammunitions, 1 holster, kag mga drug paraphernalia.
Dugang pa sang opisyal indi mabasol sang pamilya sang suspek ang mga otoridad bangud nagbato ini rason nga napatay sa operasyon.
Kaangot sini, aminado ang opisyal nga kinahanglan mangin active ang mga residente agud mahibaluan ang mga nagakatabo sa palibot kag masugid gilayon sa mga kapulisan ang sin-u-man nga mapamatud-an nga involbado sa illegal nga droga.
Indi lamang suno pa ini problema sang barangay officials kundi sa tanan gani dapat magkooperar kag magbinuligay agud matapna ini.
