Nakakita ang House Justice Committee sang probable cause angot sa impeachment ni Vice President Sara Duterte, kabangdanan nga mag-abanse na ang kaso sa plenaryo.
Nagtakop na ang apat ka adlaw nga public hearings sa House of Representatives nga ginpangunahan ni 2nd District Batangas Rep. Atty. Gerville “Jinky Bitrics” R. Luistro, kun sa diin ginpahayag sang komite nga may husto nga ebidensya batok kay Duterte, lakip na ang iya mga bank transaction records kag ang testimonya ni Ramil Madriaga nga nag-angkon nga siya ang bagman ni Duterte.
Nagbotar ang 53 ka mga mamalidha sa unanimous vote agud magpadayon ang impeachment base sa duha ka complaints: ang isa nga gin-endorso ni Rep. Leila de Lima kag ang isa nga gin-endorso ni Deputy Speaker Paolo Ortega kag Rep. Bienvenido Abante.
Madumduman nga nagtestigo si Madriaga nga gin-distribwer sini ang P125 milyon nga confidential funds ni Duterte sa sulod lang sang 24 ka oras sa Disyembre 2022.
Samtang nagpagwa man sang report ang Anti-Money Laundering Council (AMCLC) nga nagahisgot sang P6.7 bilyon nga suspicious transactions halin 2006 tubtob 2025, nga indi nagtupong sa iya declared net worth.
Sa pihak nga bahin, wala man nagtambong sa hearing si Duterte kag ang iya legal team kag hugot nga ginpanginwala ang mga alegasyon batok sa iya.
Magahimo na ang komite sang report nga kun ma-aprobahan sang majority vote, ipadala sa plenary.
Ang one-third nga boto sa plenary magaduso sang kaso sa Senado para sa trial, nga mahimo magmarka sang indi pa na-eksperyensyahan nga kahimtangan sa maragtas sang politika sa Pilipinas.
