Ginkumpirmar sang Korte Suprema ang konstitusyonalidad sang layi nga nagapalawig sa termino sang mga opisyal sang barangay kag Sangguniang Kabataan (SK) halin sa tatlo pakadto sa lima ka tuig, lakip ang pag-postpone sang Barangay kag SK Elections tubtob Nobyembre 2028.
Sa interview sang Bombo Radyo Koronadal ginpahayag ni retired Judge Lorenzo Balo, Provincial Legal Adviser sang Sultan Kudarat, nga wala na sang basehan ang pagkwestyon sa nasambit nga layi matapos nga ginpamatud-an sang Korte Suprema nga wala ini nagalapas sa Konstitusyon.
Suno pa sa iya, makahatag sang mas malawig nga tion ang lima ka tuig nga termino agud mapatuman sang mga opisyal ang ila mga programa kag proyekto. Apang mahimo man ini mangin disbentaha kon indi maayo ang ila pagserbisyo.
Samtang, ginpaathag man ni Balo nga kinamatarong sang mga opisyal sang SK ang pagbitiw sa puwesto, lakip ang asud-asud nga resignation sang SK chairperson kag mga kagawad sa isa ka barangay sa Sarangani Province.
Apang kinahanglan mahibaluan ang rason sa likod sini. Gintudlo man niya ang Department of the Interior and Local Government (DILG) bilang nagakaigo nga ahensya nga maghatag sang giya agud masiguro ang padayon nga operasyon kag serbisyo sang SK sa nasambit nga barangay.
