Halos tanan nga pampubliko nga ospital sa Rehiyon 12 ang nagapatuman na sang No Balance Billing policy agud masiguro nga makabaton sang libre nga serbisyo medikal ang mga kwalipikado nga pasyente.
Sa interview sang Bombo Radyo Koronadal kay Hanah Naanep, Public Relations Officer sang PhilHealth 12, ginpahayag sini nga madugay na nga ginapatuman ang amo nga polisiya kag indi lamang limitado sa isa ka syudad ukon banwa kundi nagalakip na sa halos tanan nga pampubliko nga ospital sa rehiyon.
Gindugang ni Naanep nga may mga pribado man nga ospital, ilabi na sa General Santos City, nga nagahatag sang libre nga ward-type accommodation sa mga kwalipikado nga pasyente.
Ang amo nga polisiya ginapatuman suno sa Republic Act No. 11223 ukon Universal Health Care Act, nga nagatuyo sa pagsiguro nga ang mga Pilipino makabaton sang kalidad kag masarangan nga serbisyo medikal.
