Ginapanawagan sang PhilHealth ang tanan nga miyembro nga magparehistro sa ila napilian nga Yaman ng Kalusugan Program (YAKAP) clinic agud ma-avail ang tubtob ₱20,000 nga annual benefit allocation para sa nagkalain-lain nga serbisyo panglawas.
Sa interview sang Bombo Radyo Koronadal ginpahayag ni Hanah Naanep, Public Relations Officer sang PhilHealth, epektibo halin Hulyo 15, 2025 ang programa kag bukas ini sa tanan nga miyembro, lakip ang employed, self-employed, voluntary members, OFWs, pensioners kag indigent members.
Lakip sa mga benepisyo ang libre nga konsultasyon, health screening, basic laboratory tests pareho sang urinalysis, fecalysis, chest X-ray, blood sugar kag cholesterol tests.
May libre man nga maintenance medicines kag iban pa nga bulong paagi sa accredited YAKAP pharmacies, suno sa reseta sang doktor.
Sakop man sang programa ang cancer screening para sa breast, lung, liver kag colon cancer, lakip ang mammogram, breast ultrasound, liver ultrasound, low-dose chest CT scan kag colonoscopy, kon may rekomendasyon sang YAKAP doctor kag himuon sa accredited facilities.
Gani, ginapahanumdom sang PhilHealth ang mga miyembro nga magparehistro anay sa YAKAP clinic agud magamit ang ila benepisyo.
